Fjörutíu árum eftir að jörðin rifnaði á Heimaey, nánast við bæjardyrnar á Kirkjubæ, vitjar Edda Andrésdóttir liðinna tíma. Annars vegar þess þegar hún var þar stelpa á sumrin hjá ömmu sinni og móðurfólki. Hins vegar dvalarinnar þegar hún, nýorðin blaðamaður, fylgdist með fjölmörgum húsum bernskunnar verða hrauni, ösku og eldi að bráð.

Hér er fólkið á Kirkjubæ í forgrunni, lífið og sumrin á sjötta og sjöunda áratugnum þegar Edda var kúasmali og mjólkurpóstur og Bítlarnir og Rolling Stones slógu taktinn í Eyjum, milli þess sem á dundu áföll og sorgir. Til Eyja geymir minningar um stað sem í barnssálinni var miðja heimsins. Þar lifði fólk í stórbrotinni náttúru sem gaf og tók á víxl, uns allt þetta hvarf skyndilega af yfirborði jarðar, djúpt undir hraun.

httpv://www.youtube.com/watch?v=HqqsLec5sZ8

****
„Edda sýnir vel hversu vel má færa sögu í orð á okkar ylhýra og ástkæra tungumáli og á hun sannarlega hrós skilið fyrir það … Til Eyja er einstaklega vönduð frásögn sem óhætt er að mæla með. Edda er hógvær en lúmskur húmoristi og ekki er verra að fá að skella aðeins upp úr við lestur svo merkilegrar sögu.“
Malín Brand / Morgunblaðið

****
Edda Andrésdóttir er mikill prýðishöfundur og bætir nú bókinni Til Eyja í bókaflóru sína … Undirtónn bókarinnar er ljúfsár. Birtan yfir bernskunni í litríku samfélaginu umleikur frásögnina, þar sem fólk lifið með og á stórbrotinni og hættulegri náttúrunni sem svo sannarlega gaf og tók til skiptis … Til Eyja er skínandi góð bók. Líkt og í fyrri bókum Eddu leikur penninn í höndum hennar. Sagan er vel stíluð og snyrtilega sögð í alla staði. Hrífandi og persónuleg bók sem gefur lesendum sérstaka sýn á mannlíf og atburði hamfaranna á Heimaey fyrir fjörutíu árum síðan.
Björgin G. Sigurðsson /

„Edda skrifar lipran og góðan stíl og fyrir vikið er bókin mjög læsileg og skemmtileg.“
Kolbrún Bergþórsdóttir / Morgunblaðið

„Listilega ofin.“
Gunnþóra Gunnarsdóttir / Fréttablaðið

„Edda Andrésdóttir hefur sérlega vandaðan stíl og frásagnir hennar verða ævinlega myndrænar og ljóslifandi. Henni er líka einkar lagið að fanga tíðarandann, svo vel reyndar, að lesandinn heyrir bókstaflega fyrirsagnaköll Óla blaðasala, finnur ilminn af pönnukökubakstri í Kirkjubæ og ösku eldgossins sáldrast um síður bókarinnar.“
Hrund Hauksdóttir / Bækur 

„Mjög falleg minningabók.“
Guðrún Gunnarsdóttir /

„Veröld sem var, en er þess verð að segja frá … Til Eyja er lítil og lágstemmd bók, skemmtilega skrifuð í nostagílskum stíl … Það er fengur að Til Eyja fyrir alla þá sem þekkja til Eyja – svo ekki sé talað um þá sem muna sjálft gosið.“
Helga Birgisdóttir /