Allar kóngulær spinna vefi. Kóngulærnar í sögunni hennar Pamelu eru samt óvenjulegar því að úr þeirra spuna kemur tónlistarvefur.

Fjórar kóngulær, Fríða fyrsta fiðla, Alma önnur fiðla, Vigga víóla og Silli Selló, spila saman í strengjakvartett. Þær spinna tónlistarvef út um allan skóg, vef sem er svolítið út um allt. Einn dag finna þær töfrastað sem flytur þær aftur í barokktímann.

Þar hitta þær tónskáldin Vivaldi og Mozart sem kynna fyrir þeim heim strengjatónlistar og hvernig það er að semja tónlist. Á vegferð sinni lenda þær í ýmsum ævintýrum og í lokin taka þær þátt í tónlistarkeppni þar sem þær spinna sinn besta tónlistarvef og leika kóngulóardansinn Tarantellu.

Strengir á tímaflakki er glænýtt íslenskt tónlistarævintýri þar sem frumsaminni tónlist eftir Steingrím Þórhallsson er fléttað saman við tónlist meistaranna Vivaldis og Mozarts. Við fáum að vita hvaða hljóðfæri skipa strengjakvartett, lærum svolítið um tónlistarsöguna og kynnumst mismunandi tónlistarstefnum.

Geisladiskur fylgir með bókinni.