Í suðurríkjum Bandaríkjanna er allt með kyrrum kjörum árið 1962 þótt ólga sé undir niðri. Hvítar konur treysta svörtum kynsystrum sínum til að sjá um heimilin og börnin en láta þær pússa silfrið undir eftirliti. Börnin elska fóstrurnar eins og mæður en fyrr eða síðar er skilið á milli, stundum af hörku.

Háskólastúlkan Skeeter snýr heim eftir lokapróf og kemst að því að fóstran hennar er horfin. Hún fær loðin svör við spurningum sínum og fer að skrifa á laun um kjör svartra kvenna. Hún fær til liðs við sig húshjálpina Aibileen sem nú elur upp sitt sautjánda hvíta barn og kvíðir því að skilja við það. Aibileen kynnir hana fyrir Minny sem missir hvert húshjálparstarfið á fætur öðru vegna þess hvað hún er kjaftfor. Saman takast þessar þrjár konur á hendur verkefni sem hefur djúpstæð áhrif á þær sjálfar og allt umhverfi þeirra.

Húshjálpin er fyrsta skáldsaga Kathryn Stockett. Hún vakti gífurlega athygli þegar hún kom út í Bandaríkjunum árið 2009, sat í margar vikur á metsölulista New York Times og hefur hlotið mikið lof lesenda og gagnrýnenda.

Ólöf Eldjárn þýddi.

httpv://www.youtube.com/watch?v=RC4X4SD2-dw

****
„Húshjálpin hefur verðskuldað farið sigurför um heiminn og er allt í senn bráðskemmtileg, upplýsandi og sorgleg.“
Signý Gunnarsdóttir / Mbl.

„Fóstrurnar tvær í stærstu hlutverkunum … stökkva sprelllifandi upp af síðum bókarinnar … Frábær skáldsaga.“