Andlit er skálduð en þó sönn saga. Hér segir Bjarni Bjarnason frá litríkri æsku á áttunda áratugnum, hvernig hann elur sig að mestu upp sjálfur, þvælist milli staða innanlands og utan og kynnist ótrúlegasta fólki; slöngukonu sem þjónað hefur heimsfrægum leikara, amerískum gúrú sem nærist á íslenskum sálum, Kleópötru sem hefur áhuga á lifnaðarháttum neðanjarðarskálda, sænskum lögreglumönnum sem finnast draumar grunsamlegir taugatrekktum flugfreyjum og draugum af ýmsu tagi.

Þetta er saga full af húmor, trega og hlýju en umfram allt einstök lýsing á sérkennilegu lífshlaupi.

Bjarni Bjarnason hefur hlotið Bókmenntaverðlaun Halldórs Laxness, Bókmenntaverðlaun Tómasar Guðmundssonar og verið tilnefndur til Íslensku bókmenntaverðlaunanna. Hér sýnir hann á sér nýja hlið með léttleikandi verki sem á köflum er lygilegra en nokkur skáldsaga.