Árni Þórarinsson

Árni Þórarinsson er fæddur í Reykjavík 1. ágúst 1950. Hann lauk B.A. prófi í samanburðarbókmenntum frá University of East Anglia í Norwich á Englandi 1973 og starfaði árum saman sem blaða- og fjölmiðlamaður, var meðal annars ritstjóri Helgarpóstsins og Mannlífs og blaðamaður á Morgunblaðinu.

Fyrsta skáldsaga Árna, spennusagan Nóttin hefur þúsund augu, kom út árið 1998 og síðan hefur hann sent frá sér allmargar bækur um blaðamanninn Einar, auk annarra sagna. Hann á einn kafla í bókinni Leyndardómar Reykjavíkur, sem nokkrir glæpasagnahöfundar skrifuðu í sameiningu og árið 2002 kom út bókin Í upphafi var morðið sem Árni skrifaði ásamt Páli Kristni Pálssyni. Þeir hafa einnig unnið saman tvö sjónvarpshandrit, Dagurinn í gær, sem sýnt var í RÚV 1999 í leikstjórn Hilmars Oddssonar og 20/20, sem Óskar Jónasson leikstýrði fyrir RÚV 2002. Síðarnefnda myndin var tilnefnd til fjögurra Edduverðlauna, meðal annars fyrir besta handrit. Þá hefur Árni sent frá sér viðtalsbók og þýðingu á barnabók eftir Evert Hartman, Einn í stríði, en fyrir þá þýðingu hlaut hann Barnabókaverðlaun Reykjavíkurborgar 1984. Spennusagan Tími nornarinnar var tilnefnd til Íslensku bókmenntaverðlaunanna 2005.

Ýmsar spennusögur Árna hafa komið út í erlendum þýðingum, meðal annars á Norðurlöndunum, í Þýskalandi og Frakkland.