Gljúfrasteinn í Mosfellsdal var heimili Halldórs Laxness í hálfa öld og þar er nú safn til minningar um ævi hans og störf, með húsmunum, bókum og listaverkum úr eigu Halldórs og Auðar konu hans. Húsið létu þau reisa á bernskuslóðum Halldórs og fluttu þangað árið 1945.

Hér er sporum Nóbelsskáldsins fylgt frá vöggu til grafar; heiman úr Mosfellsdal og út í veröldina, út á stræti stórborganna vestan hafs og austan – og aftur heim í dalinn. Skáldferill Halldórs er rakinn og sagt frá ritverkum hans, pólitískri baráttu og innri átökum, sorgum og sigrum. Einnig segir frá störfum Auðar, sem færri þekkja, og hversdagslífi jafnt sem tyllidögum á menningarheimili þeirra hjóna.

Fróðlegt og greinargott yfirlitsrit um Gljúfrasteinshjón og heimili þeirra, prýtt fjölda ljósmynda.