Lífið brosir ekki beint við einkaspæjaranum Cormoran Strike; hann er einfættur eftir stríðið í Afganistan, fær engin verkefni, er skuldsettur, sefur á skrifstofunni og kærastan fór frá honum í fússi. Þá birtist John Bristow og vill fá hann til að rannsaka sviplegt andlát systur sinnar, ofurfyrirsætunnar Lulu Landry, sem kölluð var Gaukurinn. Fyrr en varir er Strike kominn í félagsskap hinna frægu og ríku, rokkara og hátískuhönnuða, þar sem hver stund snýst um aukna gleði, spennu og háska.

Þú telur þig kannski þekkja einkaspæjara, hvernig þeir vinna, hvernig þeir hegða sér – en Cormoran Strike er öðruvísi. Gauksins gal, fyrsta saga Roberts Galbraith um spæjarann Strike, hafði þegar fengið frábæra dóma þegar upplýst var að á bak við höfundarnafnið var engin önnur en metsöluhöfundurinn J.K. Rowling. Bækurnar hafa notið mikilla vinsælda víða um heim og selst í milljónum eintaka. BBC hefur í samvinnu við HBO gert afar vandaða og vinsæla sjónvarpsþætti um Strike.

Uggi Jónsson þýddi.