Bók um óskýranlega hluti verður til að Petra og Calder kynnast og undarlegir atburðir gerast. Ómetanlegt málverk eftir Vermeer hverfur. Áður en þau vita af eru þessi tvö börn flækt í alþjóðlegt listaverkahneyksli þar sem engir – hvorki nágrannar, foreldrar né kennarar – eru hafnir yfir grun.

Hver vísbending af annarri dregur þau Petru og Calder lengra inn í dulmagnað völundarhús og þau verða að taka á öllu sem þau eiga til, nota ímyndunarafl sitt tog hæfni að ráða gátur og þekkingu sína á Vermeer. Geta þau leyst glæpamál sem Alríkislögreglan stendur ráðþrota frammi fyrir? Þessi heillandi skáldsaga er dularfull ráðgáta, búin ljóma ævintýris og sett fram á listrænan hátt.

Bókin hefur verið þýdd á meira en þrjátíu tungumál og hlotið afbragðs dóma og viðurkenningar og selst í metupplögum. Warner Bros. hefur keypt kvikmyndaréttinn á sögunni.

Blue Balliett ólst upp í New York. Hún hefur alltaf verið hrifin af söfnum, alltaf haft gaman af gátum og alltaf glaðst yfir að heyra af hlutum sem ekki verða skýrðir á venjulegan hátt. Blue las listasögu við Brown háskóla. Hún býr ásamt fjölskyldu sinni í Chicago, Illinois, þar sem hún kenndi við grunnskólann áður en hún sneri sér eingöngu að ritstörfum. Þetta er fyrsta barnabók hennar.

Brett Helquist ólst upp í Utah með sex systrum. Þau fóru ekki oft á söfn í æsku. Hann segir að áhugi sinn á myndlist eigi rætur í myndasögunum sem hann las. Brett hefur meðal annars myndskreytt metsölubækurnar Úr bálki hrakfalla eftir Lemony Snicket. Hann býr ásamt konu sinni í Brooklyn, New York.

Kristín R. Thorlacius þýddi.

„Da Vinci lykillinn fyrir krakka.“

Newsweek