Vinsælustu ljóðin

  • Höfundur: Ritstjórn Forlagsins

Ef maður rekst á barn þessa dagana að fara rímað kvæði, ískrandi af kátínu, eru yfirgnæfandi líkur á að það sé eftir Þórarin Eldjárn. Barnaljóðin hans hafa í áratugi notið gríðarlegra vinsælda hjá fólki á öllum aldri, leikskólabörnum jafnt sem ellilífeyrisþegum. Það má jafnvel fullyrða að ef Íslendingar kunna ennþá að ríma og stuðla eftir miðja 21. öldina sé það að stórum hluta Þórarni að þakka.

Árstíðirnar, nýútkomin barnaljóðabók Þórarins, er ellefta kvæðabók skáldsins fyrir börn og barnalegt fólk, eins og hann orðar það sjálfur. Flestar hefur Sigrún systir hans myndskreytt, þar á meðal þá nýjustu.

Fyrsta barnaljóðabók systkinanna kom út 1981 og geymir ljóðabálk um stúlkuna Gleymmérey en það var ekki fyrr en tíu árum síðar sem fyrsta eiginlega barnaljóðasafnið kom út, þar var bókin Óðfluga sem sló eftirminnilega í gegn. Í kjölfarið fylgdu Heimskringla og Halastjarna og seinna komu allar bækurnar þrjár saman út undir titlinum Óðhalaringla.

Grannmeti og átvextir heitir lítil en hnausþykk bók sem systkinin sendu þau frá sér 2001 og góðærisárið mikla 2007 færðu þau lesendum hvorki meira né minna en tvær bækur með barnarími: Gælur fælur og þvælur, þar sem hvert kvæði er ort undir sínum rímnahætti, og Tíu litla kenjakrakka sem kallast skemmtilega á við Tíu litla negrastráka sem olli miklu fjaðrafoki um þær mundir.

Og nú eru það Árstíðirnar. Fyrsta ljóð bókarinnar telur upp árstíðirnar fjórar í þeirri röð sem þær koma og á eftir fylgja fjögur ljóð um hverja árstíð, hvert öðru skrýtnara og skemmtilegra. Þessa bók ættu bókaormar ekki að láta fram hjá sér fara, á hvaða aldri sem þeir eru.

*****
„Jafnt ungir sem aldnir skemmta sér við lestur bókarinnar; það verður ekki á betra kosið.“
Birta Björnsdóttir / Morgunblaðið

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd