Verðlaunabók Houellebecqs væntanleg

  • Höfundur: Ritstjórn Forlagsins

Franski landbúnaðar-verkfræðingurinn, ljóðskáldið og rithöfundurinn Michel Houellebecq hefur verið kallaður „rokkari franskra bókmennta“ og er margverðlaunaður fyrir verk sín. Meðal annars hlaut hann virtustu bókmenntaverðlaun heimalandsins, Prix Concourt, fyrir nýjustu skáldsögu sína, La carte et le territoire – Kortið og landið, sem kom út 2010. Sú saga er væntanleg á íslensku hjá Máli og menningu í haust í þýðingu Friðriks Rafnssonar.

Sagan segir frá myndlistarmanninum Jed Martin sem verður þekktur fyrir sérstæðar ljósmyndir af Michelin-landakortum en málar síðan mikla myndaröð af fólki í ólíkum starfsgreinum. Þegar hann undirbýr sýningu á henni ákveður listaverkasalinn hans að fá rithöfundinn fræga, Michel Houellebecq, til að skrifa grein í sýningarskrána gegn því að Jed máli mynd af honum. Sýningin slær í gegn og málverkin seljast fyrir óheyrilegar upphæðir. En Jed Martin bregður í brún þegar lögreglan hefur samband við hann nokkru seinna vegna óhugnanlegs morðmáls … Sagan er bæði skemmtileg og spennandi og sameinar raunar á einstæðan hátt glæpasöguna, örlagasögu einstaklings, lýsingu á sambandi föður og sonar og hárbeitta greiningu á þróun listheimsins og samfélagsins á 21. öldinni. Um hana sagði Alex Clark í The Guardian: „Þessi fimmta skáldsaga hans er bæði skemmtilega skrítin og öfugsnúin, þar þróast hálfháðsleg rannsókn á listheiminum út í blóði drifið morðmál, raunsæilegum skáldsagnapersónum er blandað saman við í hæsta máta óraunsæjar persónur sem reynast spretta beint úr veruleikanum, og höfundurinn sjálfur læðist hæversklega inn í söguna en yfirgefur hana með háum hvelli …“ Áður hafa tvær skáldsögur Houellebecqs komið út á íslensku í þýðingu Friðriks, Öreindirnar (2000) og Áform (2002).

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd