Sigurður upp á sitt besta

  • Höfundur: Ritstjórn Forlagsins
Sigurður Karlsson

Sigurður Karlsson fær fallega kveðju frá Friðriku Benónýsdóttur í Fréttablaðinu í dag fyrir þýðingu sína á dystópíunni Græðaranum eftir Antti Tuomainen sem Forlagið var að gefa út. Hún segir: „Sigurður Karlsson vex með hverri þýðingu og er hér upp á sitt besta með skýran og kjarnyrtan texta sem engin leið er að fetta fingur út í. Finnar hljóta að hrósa happi að hafa í sinni þjónustu svo vandvirkan og vel skrifandi þýðanda og Íslendingar hljóta að hlakka til að fá áfram að kynnast finnskum samtímabókmenntum í gegnum þýðingar hans. “ Sigurður hefur verið ötull og mikilvirkur þýðandi úr finnsku á undanförnum árum. Skemmst er að minnast þess að fyrir jól kom út hjá Uppheimum gríðarmikil bók eftir Tapio Koivukari í þýðingu hans, Ariasman, og fyrir Mál og menningu hefur hann þýtt tvær skáldsögur eftir Sofi Oksanen, verðlaunabókina Hreinsun og Kýr Stalíns, auk Græðarans.

Um Græðarann segir Friðrika: „Hún er heldur nöturleg framtíðarmyndin sem Antti Tuomainen dregur upp í þriðju skáldsögu sinni Græðaranum, sem valin var besta glæpasaga í Finnlandi árið 2011. Sögusviðið er Helsinki í ekki svo fjarlægri framtíð en þó gjörólík þeirri Helsinki sem við þekkjum í dag. Vegna loftslagsbreytinga er stór hluti suðurhvels jarðar óbyggilegur og íbúar flýja norður, meðal annars til Helsinki. Þessum þjóðflutningum fylgja upplausn og óöld, morð, rán og djöfulskapur og lögreglan hefur nánast gefist upp á að takast á við ástandið. Enn er þó verið að rannsaka grimmdarleg morð á auðmönnum og fjölskyldum þeirra og morðinginn hefur hlotið viðurnefnið Græðarinn. Blaðamaðurinn Johanna hefur einnig áhuga á því að komast á slóð Græðarans og leggur ýmislegt í sölurnar. Þegar hún hverfur situr eiginmaður hennar, ljóðskáldið Tapani Lehtinen, uppi með það að enginn virðist hafa áhuga né getu til að komast að því hvað orðið hefur um Jóhönnu og fer því sjálfur á stúfana í leit að henni og um leið auðvitað að lausn morðgátanna. Sagan er þannig allt í senn heimsendissaga, glæpasaga, ádeila á kæruleysi í umhverfismálum og ástarsaga.“ Þessi dreifða áhersla finnst Friðriku draga úr styrk sögunnar en þar kemur annað á móti: „Það sem gerir söguna hins vegar áhugaverðari en margar aðrar norrænar glæpasögur er frásagnarhátturinn og stíllinn. Hvort tveggja gegnsýrt af finnskri svartsýni og gálgahúmor, sem er óneitanlega hressandi. Hér er hvorki bruðlað með orð né tilfinningar og það er textinn sem gerir það að verkum að Græðarinn heldur lesandanum við efnið … Ýmsar aukapersónur eru líka bráðvel dregnar og eru þar minnisstæðastir lögregluvarðstjórinn Jaatinen og leigubílstjórinn Hamid.“

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd