

Þær Sigurbjörg Þrastardóttir og Kristín Ómarsdóttir hafa verið á ferð og flugi undanfarnar vikur en stuttleikrit þeirra, Boltastrákar (Bolddrenge) og Trjágarðurinn (Træhaven), hafa verið sett upp í Danmörku og Svíþjóð.
Leikritin eru sérlega áhugaverð í ljósi umfjöllunarefnanna sem eru óhefðbundin í meira lagi.
Leikrit Sigurbjargar fjallar um síamstvíbura sem undirbúa tennisleik – og vitjun augnlæknis – utanhúss. Það var sett upp á leiklistarhátíðinni CPH STAGE í Kaupmannahöfn fyrir skemmstu, með dönskum leikurum, og undir lok mánaðar af Teater inSite í Malmö, með sænskum leikurum.
Sama á við um leikrit Kristínar en það fjallar um síðasta korterið í lífi tveggja lesbískra kvenna sem þær verja með böðli sínum.
Allt er þetta partur af norrænu leikhúsverkefni á vegum Dramafronten, í samvinnu við Det Kongelige Teater.
Von er á nýrri ljóðabók, Kóngulær í sýningargluggum, eftir Kristínu með haustinu en Sigurbjörg gaf út örsagnasafnið Óttaslegni trompetleikarinn og fleiri sögur fyrir jólin í fyrra við afar góðar undirtektir.





