Ormstunga – þriðja bók í „mögnuðum sagnaflokki“ á leið í verslanir

  • Höfundur: Ritstjórn Forlagsins
Ormstunga

Aðdáendur Þriggja heima sögu hafa beðið óþreyjufullir eftir þriðja bindi verksins frá því að þeir skildu við söguhetjurnar með gríðarmikilli sprengingu í lok Draumsverðs. Nú hafa höfundarnir lokið við framhaldið og Forlagsfólk tilkynnir með stolti að Ormstunga kemur í verslanir miðvikudaginn fyrir páska.

Þriggja heima saga fór af stað með glæsibrag haustið 2012 þegar fyrsta bókin, Hrafnsauga, hlaut Íslensku barnabókaverðlaunin. Í framhaldinu hlaut hún frábærar viðtökur, hreppti Íslensku bóksalaverðlaunin í flokki ungmennabóka og í fjögurra stjörnu dómi sínum í Fréttablaðinu sagði Brynhildur Heiðar- og Ómarsdóttir: „Hrafnsauga er sígilt ævintýri, klassísk fantasía, stórskemmtileg og spennandi, og afskaplega vel skrifuð.” Og Árni Matthíasson tók í sama streng í Morgunblaðinu, gaf bókinni sömuleiðis fjórar stjörnur og sagði: „er hér komið upphaf að mögnuðum sagnabálki.“ Þá bætti Sigrún Þöll um betur í vefritinu Pjattrófurnar og sagði: „Ef þessi bók læðist í pakkann hjá barninu þínu mæli ég með að þú nappir henni og færð að lesa hana næst á eftir unglingnum á heimilinu, því þetta er frábær ævintýrasaga!“

Draumsverð hlaut ekki síðri viðtökur. Friðrika Benónýsdóttir sagði í Fréttablaðinu að þar færi „kröftugt og spennandi framhald Hrafnsauga. Fantasía með breiðri vísun, sannferðugum persónum og góðri sögu.“ Og Árni Matthíasson tók dýpra í árinni í Morgunblaðinu:  „Fyrri bókin í sagnabálknum Þriggja heima sögu, Hrafnsauga, hlaut Íslensku barnabókaverðlaunin 2012 og stóð vel undir því. Þessi, sem segir líka frá ferðaraunum Ragnars, Breka og Sirju, er enn betri, mun betur skrifuð og framvindan ævintýralegri.“

Þriggja heima saga er breið furðusaga eftir æskuvinina Kjartan Yngva Björnsson og Snæbjörn Ragnarsson. Sagnaflokkurinn teygir anga sína um víða og framandi veröld og hentar lesendum á öllum aldri – stálpuðum börnum, unglingum og fullorðnum. Þriðja bókin, Ormstunga, kemur út í kiljuformi og er því einkar hentug að grípa með sér í fríið – eða bara upp í sófa. Það eitt er víst að lesendur verða ekki sviknir!

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd