Kraftmikið innlegg í eilífa baráttu kynjanna

  • Höfundur: Ritstjórn Forlagsins
Gerður Kristný

Magnus Ringgren fjallaði um Blóðhófni, verðlaunaljóðabók Gerðar Kristnýjar, í Aftonbladet í gær en bókin er nýkomin út í sænskri þýðingu Johns Swedenmarks. Grein Ringgrens ber yfirskriftina „Forn íslenskur kveðskapur á einnig erindi við nútímann“ og vísar þar til þess að kvæðið styðst við söguþráð eddukvæðisins Skírnismála. Hann rekur efnisþráð Skírnismála fyrir lesendum blaðsins, söguna um það þegar Freyr sendir skósvein sinn Skírni til að biðja jötnameyjarinnar Gerðar fyrir sína hönd, og hvernig hún streitist á móti en bugast loks undan hótunum hans. „Góður efniviður,“ er niðurstaða Ringgrens, „og ef maður heitir Gerður Kristný og er þar með nafna jötnameyjarinnar, fædd 1970 á Íslandi og rithöfundur, hlýtur að hafa verið óumflýjanlegt að nota hann.“

Ringgren segir að ljóðmál Gerðar, stuðlasetning og hrynjandi, kallist sterklega á við eddukvæðin gömlu og hrósar John Swedenmark fyrir hversu vel honum tekst að koma þessu til skila í sænsku þýðingunni. Það er enda vandaverk því texti Gerðar er meitlaður og knappur eins og íslenskir lesendur þekkja.

Að lokum rýnir Ringgren í boðskap kvæðisins. „Þetta er ofbeldisfullt brúðarrán. „Sverðið / spegill sálarinnar“ skilur stúlkuna frá heimili og móður og öryggi. Það fær hún aldrei aftur. Án þess að predika verður texti Gerðar Kristnýjar þannig kraftmikið innlegg í eilífa baráttu kynjanna.“

Blóðhófnir er einnig komin út í enskri, danskri og finnskri þýðingu og hefur hvarvetna hlotið feykigóðar viðtökur. Fyrir bókina hlaut Gerður Íslensku bókmenntaverðlaunin og var tilnefnd til Bókmenntaverðlauna Norðurlandaráðs. Blóðhófnir er uppseld á íslensku en er væntanleg í heildarljóðasafni Gerðar Kristnýjar sem kemur út að ári.

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd