Íslensk listasaga kemur út með haustinu

  • Höfundur: Ritstjórn Forlagsins
Íslensk listasaga

Á haustmánuðum 2011 kemur út metnaðarfullt yfirlitsverk um íslenska myndlist. Íslensk listasaga er fimm binda verk sem spannar tímabilið frá síðari hluta 19. aldar til upphafs 21. aldar. Bindin verða gefin út samtímis í vandaðri öskju og verður verkið allt um 1500 blaðsíður.

Forlagið gefur verkið út í samvinnu við Listasafn Íslands og er markmiðið með útgáfunni ekki aðeins að gera grein fyrir sögu íslenskrar myndlistar heldur einnig að styrkja og móta hugmyndir okkar um myndlist þjóðarinnar, sameiginlega arfleifð hennar og sjálfsmynd.

Verkefnið hefur átt sér langan aðdraganda en í ársbyrjun 2007 var Ólafur Kvaran ráðinn ritstjóri þess, ritstjórn skipuð og samningar gerðir við fjórtán höfunda. Við ritun verksins er lögð sérstök áhersla á einkenni íslenskrar myndlistar á hverju tímaskeiði, sögulegt samhengi hennar og samband við alþjóðlega listasögu. Í umfjöllun og túlkun höfundanna er þannig leitað svara við ýmsum sameiginlegum spurningum en jafnframt eru áherslur þeirrar ólíkar því viðfangsefnin eru um margt ólík.

Í hverju bindi er tekið mið af skýrum kaflaskiptum í íslenskri listasögu. Fyrsta bindið fjallar um tímabilið frá seinni hluta 19. aldar fram til um 1930, tímabil brautryðjendanna þegar rómantísk náttúrutúlkun og symbólismi eru ríkjandi. Í öðru bindi (1930–1945) er ritað um þau þáttaskil sem urðu um 1930 þegar fram á sjónarsviðið kom ný kynslóð listamanna sem tengdist róttækum viðhorfum í evrópskri myndlist. Í þriðja bindinu (1945–1960) er fjallað um abstraktlistina þegar hlutverk listarinnar var ekki lengur fólgið í því að túlka hinn sýnilega veruleika með beinum hætti heldur með abstraktformum og litum. Með tilkomu nýsúrrealisma, popplistar og nýdadaisma upp úr 1960 sköpuðust forsendur fyrir róttækri nýsköpun í íslenskri myndlist, og í fjórða bindinu (1960–1980) er tekið mið af þessum kaflaskiptum í byrjun sjöunda áratugarins. Þau tímamót sem urðu með tilkomu nýja málverksins, gjörningalistarinnar, myndbandslistarinnar og endurnýjunar hugmyndalistarinnar í byrjun níunda áratugarins marka svo upphaf fimmta og síðasta bindis listasögunnar sem fjallar um tímabilið frá 1980 og fram yfir aldamótin 2000.

Í verkinu verða litljósmyndir af mörg hundruð listaverkum, sem varðveitt eru á söfnum hérlendis sem erlendis eða eru í einkaeigu, og yfirgripsmikill fróðleikur sem nú verður aðgengilegur almenningi á einum stað. Útgáfa Íslenskrar listasögu er því mikið menningarlegt framlag sem vert er að gefa gaum á erfiðum tímum í íslensku þjóðlífi.

Verkið verður prentað í prentsmiðjunni Odda en sennilega er það einsdæmi að jafn umfangsmikið verk komi út í einu lagi hér á landi.

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd