Glænýjar gersemar á Bókmenntahátíð

  • Höfundur: Ritstjórn Forlagsins
Bókmenntahátíð

Nú er hátíð í bæ því á morgun, miðvikudaginn 10. september, verður Bókmenntahátíð 2015 sett! Hátíðin fagnar í ár 30 ára afmæli sínu og verður dagskráin fjölbreytt að vanda. Von er á 15 erlendum höfundum auk þess sem fjöldi íslenskra höfunda kemur fram. Upplestrar, pallborðsumræður, fyrirlestrar, kvikmynda- og málverkasýningar eru hluti af dagskránni, að ógleymdu Bókaballinu! Við hvetjum alla bókaunnendur til þess að kynna sér dagskrána og njóta Bókmenntahátíðar til hins ítrasta. Dagskrána má skoða hér. Ókeypis er inn á alla viðburði, nema annað sé tekið fram.

Í dag gefur Forlagið úr þrjár nýjar bækur eftir höfunda sem væntanlegir eru á Bókmenntahátíð 2015:

Ljósmóðir af Guðs náð – Katja Kettu
Bókinni er e.t.v. best lýst með eftirfarandi setningu frá gagnrýnanda Berlingske: „Lostafull saga af vonlausri ást í finnska hlutanum af forgarði helvítis.“  Hún er rangeyg, fyrirlitin og óskilgetin en hefur einstaka gáfu til að taka á móti börnum. Skelfingarsumarið 1944 hittir hún glæsilegan Þýskan SS-foringja lengst norður í Finnlandi og verður á augabragði heltekin af honum. Smám saman heillast hann líka af henni og þau þola saman – og sundur – hrikalegan óhugnað síðustu stríðsáranna. Finnska skáldkonan Katja Kettu (f. 1978) hefur heillað lesendur víða um lönd með þessari mögnuðu skáldsögu. Fyrir hana hlaut hún tvenn af eftirsóttustu bókmenntaverðlaunum Finna.

Þúsund og einn hnífur – Hassan Blasim
Hassan Blasim er rithöfundur og kvikmyndagerðarmaður frá Írak sem hefur búið í Finnlandi frá árinu 2004 en skrifar á arabísku. Þessi bók geymir úrval af smásögum hans sem hafa vakið geysilega athygli víða um lönd á undanförnum árum og hefur Blasim verið líkt við svo ólíka höfunda sem Kafka, William Burroughs og töfraraunsæisskáld Suður-Ameríku. Sögusvið þessara áleitnu sagna er Írak nútímans eftir fall Saddams Hussein, þar sem ríkir vargöld og upplausn á flestum sviðum. Sögurnar eru hispurslausar og harkalegar, húmorinn svartur, en í þeim má líka finna ljóðræna fegurð og mannlega nánd.

Fjársjóður herra Isakowitz – Danny Wattin
Þegar níu ára sonur Dannys Wattin heyrir af fjársjóðnum sem langafi hans skildi eftir þegar hann var fluttur í útrýmingarbúðir nasista finnst honum upplagt að leita hans. Ásamt föður Dannys halda þeir feðgar því á slóðir ættfeðranna og rifja í leiðinni upp ævintýri þeirra og sögu stríðsátakanna. Danny Wattin þykir einn hæfileikaríkasti höfundur Svía og stíll hans er bæði skemmtilegur og sérstakur, enda hefur verkum hans verið líkt við sögur Kurts Vonnegut, Mikhaíls Búlgakov, George Orwell og Roalds Dahl.

Auk þessarra þriggja hafa áður komið úr þrjár geysivinsælar bækur hjá Forlaginu eftir höfunda sem væntanlegir eru á Bókmenntahátíð: Alex eftir Pierre Lemaitre, Aftur á kreik eftir Timur Vermes og Mamma segir eftir Stine Pilgaard.

Góða skemmtun!

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd