Ekkert svartnætti

  • Höfundur: Ritstjórn Forlagsins

Kristín Steinsdóttir rithöfundur var í viðtali hjá Agli Helgasyni í Kiljunni í vikunni þar sem þau spjölluðu um skáldsögu hennar, Ljósu, og kveikjuna að henni; ævi og örlög ömmu Kristínar sem þjáðist af geðhvarfasýki eins og Ljósa, aðalpersóna sögunnar. Á sögutímanum, sem hefst seint á 19. öld og nær fram á fjórða áratug síðustu aldar, höfðu menn fá ráð við geðsjúkdómum önnur en að loka fólk inni eða „smíða utan um það“ ef það var æst og illviðráðanlegt. Þannig er með konuna í sögunni, sem þá er orðin húsmóðir á stóru heimili og margra barna móðir; fólkið hennar er algerlega vanmáttugt til að hjálpa henni í köstunum og getur fátt annað gert en að reyna að sjá til þess að hún skaði hvorki sjálfa sig né aðra – og má rétt ímynda sér andlegar þjáningar þess og sjúklingsins sjálfs við þær aðstæður. Öllu þessu gerir Kristín góð skil í sögu sinni sem hefur fengið þær umsagnir að hún sé hrífandi falleg, áhrifamikil og vel stíluð. Í viðtalinu segir Kristín frá því að hún hafi aflað sér margvíslegra heimilda um geðsjúkdóma og aðstæður geðsjúkra fyrr á tíð enda skilar sú þekking sér í sögunni. Þetta er þó engin harmsaga frá upphafi til enda eins og Egill Helgason taldi ástæðu til að árétta í lok viðtalsins; Ljósa sé „mjög skemmtileg … lifandi persóna, skapmikil og heit“ og bókin ekkert  svartnætti. – Sem sagt; grátur og hlátur, líkt og segja má um svo margar góðar sögur!

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd