
Velgengni Arnaldar Indriðasonar í Frakklandi virðist engan enda ætla að taka. Verk hans sitja svo vikum skiptir á metsölulistum og hafa selst í milljónavís þar í landi og nú hefur verið tekin ákvörðun um að í útgáfum ársins 2018 á tveimur alfræðiorðabókum, Le Robert Illustré og Le Petit Larousse fær höfundurinn sína eigin færslu.
Le Robert Illustré er virtasta alfræðiorðabókin í Frakklandi. Á hverju ári er sérstök nefnd sem fer yfir ný hugtök og orð og velur úr þau sem þau telja að eigi erindi í ritið. Árið 2018 verður einungis 15 höfundum bætt í ritið og er Arnaldur einn þeirra. Svo virðist sem einungis hafi einum íslenskum höfundi hlotnast þessi heiður áður, Halldóri Laxness. Þetta undirstrikar enn álit Frakka á Arnaldi en árið 2015 var hann sæmdur frönsku riddaraorðunni fyrir listir og bókmenntir.





