75 ára afmæli Sigurðar Pálssonar

  • Höfundur: Ritstjórn Forlagsins

Sigurður Pálsson, einn fremsti rithöfundur Íslands, hefði orðið 75 ára þann 30. júlí. Sigurður sinnti ýmsum störfum um ævina. Hann var fréttaritari, leiðsögumaður, kennari og vann við sjónvarp og kvikmyndir en einkum fékkst hann þó við ritstörf og þýðingar. Hann var forseti Alliance Française um skeið og formaður Rithöfundasambands Íslands. Síðustu æviárin kenndi hann ritlist við Háskóla Íslands.

Eftir Sigurð liggja fjölmörg verk en endurminningabækurnar, þar sem hann teflir á sinn einstaka hátt saman lifandi fortíðarmyndum, hugleiðingum og hugmyndum sem mótuðu hann, eru nú fáanlegar sem hljóðbækur í lestri Hannesar Óla Ágústssonar. Fyrst kom út Minnisbók þar sem Sigurður rekur minningar sínar frá Frakklandi á árunum 1967‒1982. Því næst sendi hann frá sér Bernskubók sem hann byggir á uppvaxtarárum sínum í Norður-Þingeyjarsýslu frá fæðingu til fjórtán ára aldurs. Táningabók er síðasti hluti endurminningaþríleiksins og hún hlaut ekki síðri viðtökur en fyrri bækurnar tvær, enda einstaklega heillandi á lýsing á því hvernig sveitadrengurinn varð það skáld sem sem seinna varð þjóðþekkt.

Fyrsta ljóðabók Sigurðar, Ljóð vega salt, kom út 1975. Hann hlaut Íslensku bókmenntaverðlaunin árið 2007 fyrir Minnisbók og hafði áður verið tilnefndur til þeirra fyrir Ljóðlínuskip og Ljóðtímaleit.

Sigurður skrifaði einnig skáldsögur, leikrit, sjónvarps- og útvarpshandrit og óperutexta, og sendi að auki frá sér fjölda þýðinga. Hann hlaut Grímuverðlaunin árið 2008 fyrir leikverkið Utangátta.

Sigurður var borgarlistamaður Reykjavíkurborgar á tímabilinu 1987‒1990, honum var veittur riddarakross orðu lista og bókmennta (Chevalier de l‘Ordre des Arts et des Lettres) af menningarmálaráðherra Frakklands árið 1990 og Frakklandsforseti sæmdi hann riddarakrossi frönsku heiðursorðunnar (Chevalier l‘Ordre National du Mérite) árið 2007. Hann hlaut verðlaun Jónasar Hallgrímssonar á degi íslenskrar tungu 2016. Á nýársdag 2017 var Sigurður sæmdur riddarakrossi Hinnar íslensku fálkaorðu fyrir framlag sitt til íslenskra bókmennta og menningar og í maí það ár veittu Rithöfundasamband Íslands og Landsbókasafn Íslands honum jafnframt Maístjörnuna fyrir ljóðabókina Ljóð muna rödd.

Sigurður lést 19. september 2017.

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd