Hvernig á að segja sögu? Íþrótt frásagnarlistarinnar er viðfangsefni þessarar bókar. Efniviðurinn eru íslenskar skáldsögur frá upphafi sínu um miðja nítjándu öld og fram undir 1970, hinn sígildi sagnaarfur síðari tíma. Rakinn er samfelldur þráður hefðar og nýjunga frá Pilti og stúlku Jóns Thoroddsens til Guðbergs Bergssonar, Thors Vilhjálmssonar og Svövu Jakobsdóttur. Hér er skyggnst um í ritsmiðju Halldórs Laxness, Þórbergs Þórðarsonar og fleiri stílsnillinga á tuttugustu öld, og horft yfir sífelld átök við söguþráð, málfar, sjónarhorn og sögumann á þessum umbrotatímum íslenskrar nútíðar.

Í Sagnalist fæst Þorleifur Hauksson íslenskufræðingur við stílbrögð og frásagnartöfra klassískra höfunda okkar af fræðilegri alúð en jafnframt með ástríðu bókmenntamannsins. Höfundur sýnir og skýrir þróun stíls og frásagnarhátta á hverjum tíma, og beitir sér einkum að þeim höfundum sem best hafa stíltök og standa í fararbroddi nýjunga. Með Sagnalist sinni færir Þorleifur Hauksson okkur nær kjarna máls í frægum verkum og minna þekktum, og stofnar til nýrra kynna við völunda stíls og frásagnar á heillandi tímum í íslenskum bókmenntum.

Sagnalist er annað grundvallarrit Þorleifs Haukssonar á þessu sviði. Hið fyrra, Íslensk stílfræði þeirra Þorleifs og Þóris Óskarssonar, kom út árið 1994 við góðar undirtektir íslenskra lesenda.