Bókin Lauftré á Íslandi er önnur bókin í bókaflokknum „Við ræktum“ gefin út af Sumarhúsinu og garðinum, fyrst árið 2006. Önnur útgáfa hennar sem nú er gefin út var endurbætt og yfirfarin í ágúst 2020. Til viðbótar við þær 50 tegundir lauftrjáa sem fjallað var um í fyrstu útgáfu bókarinnar bætast við 8 tegundir í annarri útgáfu. Auk nýrra tegunda bætast við upplýsingar um nýja sjúkdómar og vágesti úr skordýrafánunni sem fest hafa sig í sessi á Íslandi frá 2006.

Bókin er handhægur leiðarvísir fyrir fagfólk jafnt sem áhugafólk um lauftré sem náð hafa yfir 5 metra hæð á Íslandi. Í bókinni er fjallað um tegundir sem ýmist eru vel kunnar eða lítt reyndar, en talið að geti þrifist við íslensk skilyrði. Fjallað er um uppruna tegundanna, reynslu af ræktun þeirra á Íslandi, eðli og gerð. Farið er inná erfðafræðilega þætti, umönnun, þrif og fjölgun trjánna. Sjúkdómum og skordýrum sem skaða og sækja á trén eru gerð skil og fuglarnir sem flögra í trjánum og nærast á skordýrum sem á þau sækja. Allt upplýsingar sem auðvelda lesandanum að átta sig á þeim fjársjóði sem úr er að velja þegar kemur að vali lauftrjáa í garðinn, sumarhúsalandið, skjólbelti eða til að nota í skógrækt.

Fjöldi fagmanna kom að gerð bókarinnar. Auður I. Ottesen garðyrkjufræðingur er ritstjóri hennar og einn meginhöfunda hennar. Þórarinn Benediktz skógfræðingur og Tryggvi Marinósson garðyrkjufræðingur eru meðhöfundar, auk þess eru í bókinni nokkrar greinar sérfræðinga.