Tauvefsmiðja á Leirá í Leirársveit var fyrsta verkefni Hins íslenska hlutafélags árið 1751. Ári seinna fékk félagið rausnarlegan stuðning konungs og sérleyfi til að standa að allsherjarviðreisn atvinnuveganna, sem þá var farið að kalla einu nafni Innréttingarnar. Um leið bættist við klæðavefsmiðja á Bessastöðum. Fyrsta íslenska hlutafélagið var stofnað á Þingvöllum 19. júlí 1751 til að sameina krafta landsmanna um Landsins forbetran. Stefnt var að sókn til framfara sem fólst einkum í baráttu fyrir nýjum aðferðum við ullarvinnslu í vefsmiðjum í stað heimilisvinnu með miðaldasniði.

Í bókinni fjallar Hrefna Róbertsdóttir um iðnaðarstefnu íslenskra og danskra embættismanna og rekur hvað varð úr þeim nýjungum í ullarvinnu sem stefnt var að á tímabilinu 1750-1770. Þessar tvær vefsmiðjur voru síðar fluttar til Reykjavíkur og urðu kjarni verksmiðjuþorpsins sem þar reis við Aðalstræti og varð upphafið höfuðborg Íslendinga.

Bókin er gefin út í ritröðinni Sagnfræðirannsóknir.