Um bókina
Í kjölfar sambandslagasamningsins sem veitti Íslendingum fullveldi frá Danmörku árið 1918 hófust viðræður á milli landanna um endurheimt íslenskra skjala og handrita frá Danmörku. Samkomulag náðist um málið og árið 1928 afhentu Danir Íslendingum skjöl er vörðuðu íslenska ríkið og stjórnun þess. Skjölin sem afhent voru Þjóðskjalasafni Íslands voru úr Ríkisskjalasafni Danmerkur, Konungsbókhlöðunni, safni Árna Magnússonar og frá Hæstarétti Danmerkur. Þar er að finna margar grundvallarheimildir um sögu Íslands á fyrri öldum. Þessi bók var gefin út í tilefni af aldarafmæli fullveldis Íslands árið 2018 og 90 ára afmæli Dönsku sendingarinnar 1928 og í henni er að finna umfjöllun um forsendur og innihald sendingarinnar ásamt sýnishornum af skjölum úr sendingunni. Mörg skjalanna eru meðal mestu dýrgripa í Þjóðskjalasafni og má þar nefna manntalið 1703 sem tekið var á lista UNESCO yfir Minni heimsins árið 2013.
