Aska er eftir Thelmu Ingvarsdóttir Herzl. Þegar Eyjafjallajökull gaus vorið 2010 var Thelma stödd í Austurríki. Hún var ein af þeim sem undraðist hvað máttur íslenska eldfjallsins var mikill þegar lofthelgi heillrar heimsálfu lokaðist vegna þessa atburða.

Einn að uppistöðuþáttum verka hennar hefur verið tilfinningasambandið við upprunann og úr varð að þegar gosinu linnti að hún flaug til Íslands og fór á vettvang umbrotanna. Hún tók ljósmyndir af ummerkjum gossins, af öskuninni og hvernig hún breytti landinu og gekk í samband við gróður, vatn og ís. Þannig verður grá hula öskunnar að bakgrunni sem hún vinnur með. Yfirborði þar sem hún sér form og myndir. Lifandi land.

Thelma Ingvarsdóttir Herzl fæddist í Skerjarfirði í Reykjavík og ólst þar upp. Hún varð landsfræg þegar hún varð fegurðardrottning Íslands og síðar fegurðardrottning Norðurlanda 1963 og í mörg ár starfaði hún sem fyrirsæta víða um Evrópu. Rósa Guðbjartsdóttir skráði ævisögu hennar sem kom út árið 1992. Hún settist að í Austurríki um 1970 og hefur búið þar síðan.

Thelma hefur um árabil starfað að list sinni, einkum skúlptúr, og á að baki fjölmargar sýningar víða um Evrópu. Hún hefur einnig unnið með ljósmyndir og bók með ljósmyndum hennar af skúlptúrum úr áli í íslenskri náttúru, Metal Dreams, var tilnefnd til þýsku ljósmyndabókaverðlaunanna, Deutscher Fotobuchpreis, árið 2004.