Þórður kakali Sighvatsson var einn mesti foringi á Sturlungaöld. Hann var stórbrotin persóna, viljafastur og mikill hermaður, en um leið mannlegur og vinsæll. Hann sameinaði hörku, vitsmuni og skipulagsgáfu. Ásgeir Jakobsson rekur hér sögu Þórðar kakala eftir þeim sögubrotum sem til eru bókfest af honum hér og þar í Sturlungasafninu — í Þórðarsögu, Íslendingasögu, Arons sögu Hjörleifssonar, Þorgils sögu skarða og Hákonar sögu. Ásgeir bregður upp lifandi myndum af mannlífi og valdabaráttu á Sturlungaöld og varpar meðal annars nýju ljósi á einu sjóorrustu Íslendinga, Flóabardaga.
Enginn íslenskur höfundur hefur skrifað um sjómenn, skip og hafið eins og Ásgeir Jakobsson (1919–1996). Hann var landskunnur fyrir skrif sín um sjávarútvegsmál og ævisögur hans um útgerðarmenn hafa sérstöðu í bókmenntum okkar.