Þitt eigið tímaferðalag er fimmta bókin í einum vinsælasta íslenska bókaflokki síðari ára. Fyrri bækurnar hafa hlotið bæði Bókaverðlaun barnanna og Bóksalaverðlaunin, og verið tilnefndar til Íslensku bókmenntaverðlaunanna og Barnabókaverðlauna Reykjavíkur.

Þitt eigið tímaferðalag er öðruvísi en aðrar bækur. Hér ert þú söguhetjan og ræður ferðinni. Viltu hitta víkinga, Rómverja eða risaeðlur? Þorirðu að athuga hvað er um að vera á Jörðinni eftir 100 ár? Hvað með 1000? Passaðu bara að týna ekki tímavélinni svo þú komist örugglega heim aftur!

➣ Yfir 60 mismunandi endar.
➣ Sögulok spanna allt frá eilífri hamingju til skyndilegs bana.
➣ Ævintýralega góð skemmtun fyrir alla krakka.

Ævar Þór Benediktsson er einn vinsælasti höfundur landsins. Hann hefur hlotið fjölmargar viðurkenningar fyrir störf sín, var meðal annars valinn einn af bestu barnabókahöfundum Evrópu undir fertugu og í hóp framúrskarandi ungra Íslendinga.

Meistaralegar myndir gerir Evana Kisa.