Bókmenntirnar og sjálfsmyndin, bókmenntirnar og fortíðin – bókmenntirnar og samfélagið. Þessi efni eru á sveimi í ýmsum myndum í ýmsu efni Tímaritsins að þessu sinni.

Einar Kárason segir í ádrepu spaugilega sögu af því þegar hann var ráðinn til þess af auglýsingastofu á vegum voldugra kostunaraðila að velta vöngum yfir því hvernig ýmsar persónur úr Íslendingasögunum kynnu að birtast okkur á vorum dögum. Um afdrif þessa verkefnis Einars má lesa í grein hans en óhætt er að segja að útleggingar hans hafi farið misjafnlega í áhrifamikla menn. Arnaldur Indriðason minnir okkur hins vegar á þýðingu fornra handrita fyrir sjálfsmynd okkar en Auður Ava Ólafsdóttir varar okkur í snjöllum fyrirlestri sínum við því að hugsa um of í bókmenntakvíum.

Og er þá fátt eitt talið af efni heftisins.

Ritstjóri er Guðmundur Andri Thorsson.