Árið hefur farið af stað með áframhaldandi eldsumbrotum á Reykjanesskaga og logandi illdeilum fyrir botni Miðjarðarhafs. Því er viðeigandi að kápu Tímaritsins prýðir verkið Öryggissvæði: Eldur eftir Freyju Eilífu sem var hluti af uppboðinu List fyrir Palestínu seint á síðasta ári. Við birtum sömuleiðis ljóð palestínska ljóðskáldsins Refaats Alareer í þýðingu Þórdísar Helgadóttur en það dreifðist víða um netheima og var þýtt á fjölmörg tungumál eftir að hann lét lífið í sprengjuárás ísraelska hersins 6. desember síðastliðinn. Ómur úr öðru stríði heyrist, eða heyrist ekki, í þýðingum Aðalsteins Ásbergs úr verkinu Heyrnarlaust lýðræði eftir Ilya Kaminsky, úkraínskt-bandarískt ljóðskáld sem mun taka þátt í viðburði á vegum Reykjavík Bókmenntaborg UNESCO þann 14. mars í Mengi.

Staða örríkisins Íslands gagnvart umheiminum og hvers við erum megnug gæti talist rauður þráður í heftinu en Þorvaldur Gylfason skoðar í yfirlitsgrein tilvistarskilyrði örríkja eins og Íslands um víðan heim, Sveinn Einarsson fjallar um mikilvægi Þjóðleikhúsa og efnisval slíkra stofnana fyrir mótun menningarvitundar þjóðar og við birtum grein sem Guðbergur Bergsson skrifaði eftir andlát heimsborgarans Thors Vilhjálmssonar í þýðingu Guðmundar Andra Thorssonar.

Af öðru efni heftisins má nefna grein eftir Kristínu Svövu Tómasdóttur um þaggaðar, samkynhneigðar ástir í upphafi 20. aldar og Huldar Breidfjord færir okkur síðasta viðtalið í bili við íslenska handritshöfunda, en þar hefur hann varpað ljósi á þessa vaxandi stétt og áhrif breyttrar neyslu okkar á afþreyingarefni. Smásögur eftir Ólaf Gunnarsson, Elísabetu Jökulsdóttur, Friðgeir Einarsson, Lomma, Sigurlin Bjarneyju og Hauk Arnþórsson prýða heftið auk nokkurra nýrra og spennandi ljóða en þau rita Eiríkur Örn Norðdahl, Vala Hauksdóttir Una Margrét Jónsdóttir og Brynhildur María Ragnarsdóttir. Bókadómar heftisins eru í höndum Þorvalds S. Helgasonar, Jórunnar Sigurðardóttur, Ásta Kristínar Benediktsdóttur og Hafdísar Erlu Hafstinsdóttur. Friðgeir tekur einnig við sem pistlahöfundur Tímaritsins og hlökkum við til að lesa hugleiðingar hans á komandi ári.

Við sendum friðaróskir til lesenda Tímaritsins með von um bjartari tíma með hækkandi sól.