Guðrún fæddist 27. febrúar 1920 að Hurðarbaki í Flóa þar sem hún ólst upp. Foreldrar hennar voru Þuríður Árnadóttir (1894 – 1985) og Guðmundur Kristinn Gíslason (1890-1954) og var Guðrún elsta barn þeirra.

Guðrún giftist Sæmundi Bergmann Elimundarsyni frá Hellissandi árið 1940 og fluttist til Reykjavíkur þar sem þau bjuggu æ síðan. Þau eignuðust sjö börn en misstu þrjú þeirra á unga aldri og urðu að sjá á eftir einu í viðbót í fóstur. Guðrún andaðist 45 ára að aldri eftir erfið veikindi sem staðið höfðu árum saman.

Höfundur bókarinnar er sonur Guðrúnar og hefur gefið út allmargar bækur, umræðubækur, ljóðabækur, kennslubækur og fræðsluefni af ýmsu tagi, auk þess sem hann hefur skrifað mikinn fjölda greina. Hann hefur starfað sem háskólakennari við Háskóla Íslands frá árinu 2001 og lauk doktorsprófi árið 2014. Áður starfaði hann við Framhaldsskólann í Skógum, m.a. eitt ár sem skólameistari.