Sögusvið og persónur Sköglu eru dregin víðs vegar að úr kvæðum og handritum fornskálda um norrænu goðin og heim þeirra. Sviðsljósinu er beint að ýmsum aukapersónum úr fornsögunum á meðan þekktustu goðin sjálf stíga til hliðar.

Þegar dvergurinn Nýráður og fósturdóttir hans, Skögul, halda til fundar við konunginn í Næríki á hvorugt þeirra von á hremmingunum sem bíða þeirra. Launráð verða til þess að þeim er stíað í sundur og þurfa þau að vaða eld og brennistein til þess að finna hvort annað á ný.

Á leiðinni mæta þau blóðþyrstum nöðrum, alvitrum jötni og útlægu goði í kapphlaupi við tímann þar sem þeirra gætu beðið verri örlög en dauðinn.