Í ársbyrjun 2002 fékk Einar Már Guðmundsson bréf frá gæsluvarðhaldsfanga á Litla-Hrauni sem sagði honum sögu sína, um leið og hann færði Einari þakkir fyrir verk hans sem hefðu skipt sig miklu máli í fangelsinu.

Þremur árum síðar liggja leiðir þeirra Einars Más saman; fanginn þá að koma úr fangelsi en Einar Már úr áfengismeðferð. Þegar þeir bera saman bækur sínar stígur svo fram, í krafti sagnalistarinnar, hin magnaða og töfrum slungna ástarsaga fangans Einars Þórs og Evu, kærustu hans.

Rimlar hugans er ekki bara óvenjuleg og áhrifamikil ástarsaga tveggja einstaklinga sem lenda í hremmingum eiturlyfja og berjast við að koma lífi sínu á réttan kjöl, heldur er hún um leið frumleg skáldsaga þar sem höfundurinn tekst á við sjálfan sig af fágætri einlægni og hispursleysi.

Bókin var tilnefnd til Íslensku bókmenntaverðlaunanna 2006.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er 9 klukkustundir og 5 mínútur að lengd. Stefán Jónsson les.

,,Óvenjuleg og eftirminnileg bók á mörkum skáldskapar og ævisögu. Einar Már sýnir að hann er enn á meðal færustu rithöfunda þjóðarinnar.“
**** Kristján Hrafn Guðmundsson / DV

[Domar]

„Einn af fremstu rithöfundum þjóðarinnar um þessar mundir …
Það er ekki fráleitt að halda því fram, að hin nýja bók Einars Más Guðmundssonar eigi eftir að breyta viðhorfi fólks til fanganna á Litla-Hrauni með sama hætti og Englar alheimsins áttu þátt í að breyta viðhorfi almennings til geðsjúkra.“
Úr Reykjavíkurbréfi Morgunblaðsins

„Frábær bók og áríðandi umræða um mikilsvert málefni, fléttað í hrífandi ástarsögu.“
Sigurður G. Tómasson / Útvarp Saga

„Tímamótaverk. Einar Már er meistari skáldsögunnar. Bókin er þrungin mannkærleika og umburðarlyndi. Við erum nefnilega öll eins. Sumir fara ver út úr lífinu en aðrir,en alls staðar eru hjörtun eins. Við erum öll með sömu þrár og langanir. Nálgun Einars á fyrirbærið alkóhólisma er nærfærin,skilningsrík og hugrökk og lausninni sem boðuð er í AA-samtökunum er komið til skila.

„Rimlar hugans, ástarsaga er velskrifuð, grípandi og athyglisverð bók. Þar fléttast snilldarlega saman saga höfundarins og ungs pars. Fíkn er  rótin að vanda þeirra allra hvort sem birtingarmynd hennar er áfengis- eða eiturlyfaneysla.  Aðstæður eru þó gjörólíkar, hann er velþekktur og virtur rithöfundur en þau eru djúpt sokknir eiturlyfjaneytendur.

Þó að umfjöllunarefnið sé grafalvarlegt er frásögnin full af húmor, hlýju og léttleika. Saga Einars Más sjálfs er mjög einlæg og honum tekst líka að sýna lesendum fólkið á bak við fangann og fíkilinn. Fólk af holdi og blóði með sína drauma, vonir og þrár.  Þegar betur er að gáð eiga Einar og unga parið ýmislegt sameiginlegt. Það mikilvægasta felst í titli bókarinnar en það þarf að  brjóta hlekki eigin hugafars til þess að sigra þessa baráttu hvort sem maður er frægur rithöfundur eða fangi á Hrauninu.  Ástin skipar líka sinn stóra sess því hún er aðaldrifkrafturinn í baráttu þeirra allra.“
Elínborg Ragnarsdóttir kennari

„Spennandi, þroskandi, opinská og kómisk saga, lystilega fléttað saman örlagasögu, manns sem er fangi  og  konu hans. Einar Már skrifar flotta sögu. Hann fléttar sjálfan sig inn í örlög þeirra. Þetta er töff saga. Frábær bók.”
Sigursteinn Magnússon prentari

„Skáldsagan Rimlar hugans er lýsandi fyrir þær spurningar sem stór hópur manna reynir að svara um upphaf og endi á ógæfu og þrengingum í lífi sínu. Hér er á ferðinni þrungin frásögn úr kolsvörtu djúpi mannlegs breyskleika, þar sem ást og veikleikar spila á strengi. Þar sem fíknisjúkdómur sverfur til stáls, en gerir ekki upp á milli manna, stöðu þeirra né menntunar. Þegar mennirnir hittast fyrir tilviljun (eða var það tilviljun) þá hafa tveir ólíkir menn farið sömu leið til að finna frelsið og það eftir þrúgandi uppgjör við sjálfan sig. Einar Már Guðmundsson tjáir með snilldarlegum hætti gagnrýni á sjálfan sig,  á samtíðarmenn sína og blindu þeirra á eigin ágæti. Hér fer saman skáldskapur sem er í raun sannleikur,  þar sem persónur bókarinnar reyna að byggja framtíð sína á reynslu úr fortíð sinni, í von um frelsi. Bókin er  í senn kómísk og grafalvarleg, fléttar atburðarásir sem í fyrstu virðast ekkert eiga sameiginlegt.“
Þráinn Bj. Farestveit, framkvæmdarstjóri Verndar fangahjálpar

„Einar Már býr yfir stórkostlegri frásagnargáfu og húmor og getur gert sorglegustu og aumustu aðstæður og upplifanir manneskjunnar næstum spaugilegar, án þess að gera sér mat úr niðurlægingunni. Sagan lýsir því einnig á trúverðugan hátt hvernig greint og vel gert fólk, sem býr við góðar aðstæður, getur leiðst út í margvísleg afbrot og áhættuhegðun.

Það er mikill fengur að þessari bók – og í henni eru persónur og lýsingar sem eru sérstaklega áhugaverðar og kunnuglegar fyrir Hafnfirðinga – a.m.k. af minni kynslóð.“
Guðmundur Rúnar Árnason af www.hafnarfj.is

„Ég get ekki orða bundist eftir að hafa lesið nýjustu skáldsögu Einars Más, Rimlar hugans. Bókin er tær snilld. Sögð er saga tveggja fíkniefnaneytenda sem tvinnast saman við persónulega sögu skáldsins, af baráttu hans við Bakkus. Sagan kemur á óvart. Hún er ólík öðrum skáldsögum Einars en að sumu leyti fann ég sömu mannlegu hlýjuna og er svo einkennandi í Englum alheimsins – svo ekki sé talað um kímnina sem lesa má út úr annars alvarlegu umfjöllunarefni. Einar fellur aldrei í þá gryfju að setja sig í predikunarstellingar, eins og svo algengt er þegar þurrir alkar segja frá. Hann gerir nett grín að sjálfum sér en undirliggjandi er alvarleiki málsins. Ég var heilluð af Rimlum hugans.“
Ragnheiður Davíðsdóttir af ranka.blog.is

„Flestir tala niður til fólks eins og Einars Þórs og unnustu hans; en Einar Már er á þeirra plani og þau á hans plani algerlega áreynslulaust … Og þau eru líka bæði svo skemmtilega upprétt og falleg í veruleika sínum sem er ægilega flókinn, en samt eru þau jafnvel bráðfyndin á köflum. En til þess að þetta gangi upp þarf Einar að leggja hjartað á borðið og einhvern veginn innan í blaðsíðurnar.

Játningabækur eru yfirleitt leiðinlegar; en þetta er ekki játningabók. Þetta er bók um að bæta heiminn. Þannig kýs ég að lesa hana. Í þessari bók er heilmikil örvænting, heilmikil upprisa, heilmikið líf.“
Svavar Gestsson sendiherra

„Einar gerir skáldskap úr öllu … vekur gríðarlega margar spurningar um fíkn. Mjög flott bók.“
Páll Baldvin Baldvinsson / Kiljan / RÚV

„Þetta er saga um von.“
Eiríkur Guðmundsson/ Víðsjá /RÚV

„Einar er afburðasnjall sögumaður, flinkur í smáatriðum og innsæi, hann skissar átakalaust upp flóknar senur … Hann skrifar af krafti og innblæstri eins og oft áður, dregur hvergi af sér í þéttum vef með mörgum þráðum sem slær oft saman og greinast svo sundur …
Þessi saga markar um margt nýja slóð á ferli hans … frjó lesning, andagiftin í mínum manni söm við sig og úrvinnsla hugmyndarinnar brilljant.“
Páll Baldvin Baldvinsson / Fréttablaðið

„… gagnleg áminning um, að fleira skiptir máli í lífinu en peningar, veraldleg velgengni og glæsimennska. Allt er það yfirborð, sem engu skiptir, þegar kemur að alvöru lífsins.“
Úr Reykjavíkurbréfi Mbl. 17. nóvember 2007

„Sögurnar sem sagðar eru í þessari bók skipta máli, þær eiga ákveðið erindi við lesandann og þær eru vel skrifaðar – það kemur ekki á óvart.“
Jón Yngvi Jóhannsson / Stöð 2

„… einfaldlega sannur skáldskapur … Um stílsnilld Einars efast fáir og hún bregst ekki hér.“
Skafti Þ. Halldórsson / Morgunblaðið

„Ég veit ekkert hvað ég var að gera sunnudagskvöldið 27. janúar árið 2002 þegar nafni minn Einar Þór Jónsson var handtekinn á horni Þórsgötu og Baldursgötu þar sem hann var einn á gangi. Ég þekkti Einar Þór ekki neitt, ekki þá … en þremur vikum eftir handtökuna skrifaði hann mér bréf frá Litla-Hrauni.“

[/Domar]