Roskinn maður finnst myrtur í kjallaraíbúð í Norðurmýri. Í skrifborði hans er falin gömul ljósmynd af fjögurra ára stúlku. Myndin leiðir lögregluna inn í liðna tíð sem geymir skelfilegan glæp og fjölskylduharmleik. Á sama tíma hverfur ung kona úr brúðkaupi og mannshvarf er tekið upp að nýju.

Rannsóknarlögreglumennirnir Erlendur og Sigurður Óli standa frammi fyrir flóknu og erfiðu verkefni sem teygir anga sína inn í myrka fortíð og ólík svið samtímans.

Mýrin er snilldarvel skrifuð og snjöll íslensk spennusaga með margslungnum söguþræði sem engan svíkur. Með henni sló Arnaldur Indriðason fyrst verulega í gegn, bæði hér heima og erlendis. Bókin hefur verið þýdd á tugi tungumála og komið út víða um heim. Fyrir hana hlaut höfundurinn m.a. norrænu glæpasagnaverðlaunin Glerlykilinn.

Bækurnar um Erlend Sveinsson rannsóknarlögreglumann eru hér tölusettar eftir innri tímaröð sögunnar, Einvígið: Erlendur #1 gerist árið 1972 en Furðustrandir: Erlendur #14 2005. Útgáfuár bókanna eru innan sviga.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er um 6 klukkustundir að lengd. Guðmundur Ólafsson leikari les.