Bók þessi er afrakstur nýrra rannsókna á tilurð Brennu-Njáls sögu. Í flestum meginatriðum kemst höfundur þar að öðrum niðurstöðum, en áður hafa verið taldar þær réttu.

Helstu atriði er þessi:
– Hið kjarnyrta mál Njálu er að verulega leyti þróað talmál orðsnillinga, sem fært er til bókar.
– Höfundur er ekki skáld og er illa að sér í fornum kveðskap.
– Þótt höfundur virðist lærður maður, þá er hann ekki prestur.
– Það mun á misskilningi byggt, að Njáluhöfundur sé illa að sér í lögum.
– Þótt höfundur þekki efni sumra Íslendingasagna, þá hefur hann ekki haft neina þeirra við hendina þegar hann „setti Njálu saman“.
– Þótt höfundur sé gjörkunnugur öllum ferðaleiðum Skálholtsbiskupa, þá er hann ekki í neinum bókfræðatengslum við bókagerða- og fræðimenn í öðrum landshlutum.
– Höfundur virðist tengjast Þvottá í Álftafirði og Keldum á Rangárvöllum. Kunnugleiki hans í Vestur-Skaftafellssýslu virðist langt umfram það sem verður hjá manni sem ferðast um héraðið. Við leitina að Njáluhöfundi verður að hafa þetta þrennt í huga.

Í seinni hluta þessarar bókar eru útskýrðar, með jákvæðum huga og teknar til gegnumlýsingar, allar þær mörgu tilgátur og kenningar sem áður hafa komið fram um Njáluhöfund.

Höfundur þessarar bókar, Gunnar Guðmundsson frá Heiðarbrún, nú búsettur á Hellu, hefur frá unglingsaldri hugleitt tilurð Njálu. Á síðustu tveimur árum hefur hann notað flestar stundir til vinnslu þessarar bókar. Á þeim tíma gjörbreyttust flestar eldri skoðanir hans varðandi tilurð Brennu-Njáls sögu.