Áður.
Miles Digri Halter yfirgefur öruggt líf heima hjá foreldrum sínum. Öll ævi hans hefur verið viðburðasnauð og þráhyggja hans er andlátsorð frægra manna og veldur því að Hið mikla kannski verður honum æ hugleiknara.

Hann fer í hinn geggjaða og allt annað en leiðinlega Culver Creek heimavistarskóla og líf hans breytist í algera andstæðu öryggisins sem hann átti að venjast heima. Hann hittir herbergisfélagann Chip sem heimtar að láta kalla sig Ofurstann og gefur Miles viðurnefnið Digri af því hann er svo mjór. En mesta óöryggið stafar af því að Alaska Young býr neðar á ganginum.

Þessi frábæra, klára, fyndna, fallega, sjálfseyðandi, ruglaða og gjörsamlega heillandi Alaska Young. Hún er meira að segja sjálfri sér ráðgáta. Hún dregur Digra inn í veröld sína, sendir hann inn í Hið mikla kannski og stelur hjarta hans. Og síðan …

Eftir.
Ekkert verður nokkru sinni eins og það var.

Leitin að Alösku hefur fengið mjög góðar viðtökur gagnrýnenda og lesenda víða um heim og selst í milljónum eintaka. Að auki hefur Time Magazine valið bókina eina af 100 bestu ungmennabókum sem skrifaðar hafa verið. Bókin hefur verið þaulsetin á metsölulistum og var m.a. 200 vikur á metsölulista NY Times.