Íslenska karlalandsliðið í fótbolta er nú aðeins einu skrefi frá því að komast í umspil um sæti á HM í Brasilíu á næsta ári.

Hvernig gat það gerst að lið frá svo lítilli þjóð sé komið svona langt? Sögur útgáfa hefur undanfarið ár gefið út margar líflegar skemmttilegar bækur um fótbolta og fótboltamenn, sem ætlaðar eru fólki á öllum aldri. Nefna má bækur um Messi, Manchester United og Barcelona, sem gefin var út í samvinnu við félagið fræga á Spáni.

Nú er röðin komin að íslenska landsliðinu. Í þessari litríku og skemmtilegu bók er fjallað um landsliðið allt frá fyrsta leiknum árið 1946 og þangað til nú um miðjan september. Sagt er frá gömlum hetjum, frægum leikjum, óvæntum úrslitum en athyglinni sérstaklega beint að þeirri undankeppni fyrir HM sem nú er brátt að ljúka.

Þetta er bók um hetjurnar okkar allra að fornu og þó sérstaklega nýju. Eiður Smári, Gylfi, Kolbeinn, Alfreð, Aron Einar, Jóhann Berg og þeir félagar allir koma við sögu í þessari bók!