Ég hef ferðast víða
staðið við helgidóm Majanna í frumskóginum
heimsótt stærsta moll í Ameríku
skoðað kóralrifin
En í gær rann upp fyrir mér
að ég hef aldrei séð broddgölt
Hvernig má þetta vera?
Þetta hversdagslegasta dýr Evrópu
erkitákn í sögum og ljóðum
og ég hef hvergi séð það
nema í uppfærslu Þjóðleikhússins á Dýrunum í Hálsaskógi
Og mér skildist
þarna í gær
að kannski muni ég lifa alla mína daga
án þess að sjá broddgölt við iðju sína
Það rann upp fyrir mér
að ég veit ekki einu sinni hvernig ég ætti að haga ferðum mínum
til þess að vera alveg viss um að sjá broddgölt
Og í fyrsta sinn um árabil
fannst mér veröldin
óumræðilega
stór

Arndís Þórarinsdóttir er með BA-próf í almennri bókmenntafræði frá Háskóla Íslands og MA-próf í ritlist frá Goldsmiths College í London og Háskóla Íslands. Hún birti fyrst smásögu í Tímariti Máls og menningar árið 2005 og skrifaði eftir það reglulega í blöð og tímarit. Fyrsta bók hennar var unglingasagan Játningar mjólkurfernuskálds sem kom út árið 2011 og var tilnefnd til Norrænu barnabókaverðlaunanna. Nýlega hefur Arndís sent frá sér vinsælar barnabækur, Nærbuxnaverksmiðjuna og Nærbuxnanjósnarana, og var sú síðarnefnda tilnefnd til Íslensku bókmenntaverðlaunanna. Arndís hlaut viðurkenningu í samkeppninni um Ljóðstaf Jóns úr Vör árin 2016 og 2019.