Fegurð og mikilleiki íslensku óbyggðanna er sífellt undrunarefni. Þar jafnast fátt á við svæðið sem kallað er „að Fjallabaki“.

Fjölbreytnin er engu lík – jöklar og háhitasvæði, græn fjöll og svartir sandar, og á hinn bóginn grónir dalir og hrjóstrug fjöll. Litríkt líparítið prýðir sum svæði, annars staðar stirnir á hrafntinnu í stórum flákum. Sums staðar tefja straumþungar jökulár för göngumanns en annars staðar svala sytrandi lækir þorsta hans og mýkja sárar tær. Hér er sagt frá tólf fjölbreyttum og spennandi gönguleiðum og birtar gagnlegar upplýsingar og kort með hverri þeirra.

Íris Marelsdóttir er sjúkraþjálfari og leiðsögumaður. Hún hefur haft yndi af útivist um árabil, fer á skíðum á vetrum en stundar gönguferðir, útilegur og kajaksiglingar á sumrin. Íris hefur starfað sem landvörður í Þórsmörk og að Fjallabaki og verið fararstjóri hér heima og erlendis.