Hún kom ofan af hálendi Íslands, ólst upp á Víðirhóli á Hólsfjöllum, einum afskekktasta bæ landsins. Nú þekkir hana hvert mannsbarn á Íslandi, viðurkenningar safnast að henni og hróður hennar berst jafnvel víðar um lönd. Fyrst og fremst er hún þekkt fyrir störf sín að uppeldis- og jafnréttismálum, en hún átti líka stóran þátt í veigamiklum áföngum í mannréttindabaráttu samkynhneigðra.

Hugmyndir hennar hafa ekki alltaf gengið vel í þjóðina, og enn deila menn um eðli og árangur Hjallastefnunnar sem hún mótaði og hefur haft afgerandi áhrif á starf með börnum. En hún hefur aldrei forðast átök – aldrei verið hrædd við að vera Grýla.

Í þessari einstöku ævisögu sem Þórunn Hrefna Sigurjónsdóttir skráði segir Margrét Pála frá bernskuárum fjarri annarri byggð, tónelskum og félagslyndum föður og gáfaðri og söngelskri en alvarlega þunglyndri móður, og stormasömum æskuárum. Hún spjallar líka um lærdómsríkt skátastarf, afdrifaríka ákvörðun um að verða fóstra og misheppnaðar flóttatilraunir frá þeirri köllun. Hún segir frá byltingunni sem varð í lífi hennar þegar hún uppgötvaði hamingjuna, ástinni stóru, baráttunni við brennivínið, skrautlegum afskiptum af pólitík, og síðast en ekki síst hvernig Hjallastefnan varð til og hvað hún felur í sér.