Hannes Hafstein var bráðgert glæsimenni, orti kvæði sem lifa enn á vörum þjóðarinnar og sagt var að kvenhylli hans væri „óendanleg“. Stjórnmálaferill hans var sigurganga framan af, hann varð fyrsti ráðherra Íslands og sá stjórnmálamaður sem þjóðin hefur haft hvað mest dálæti á, lífs og liðinn.

Færri vita að þessi óskasonur Íslands átti um margt stormasama ævi og á milli stóru sigurstundanna voru sárir ósigrar. Í þessari vönduðu og skemmtilegu ævisögu beinir Guðjón Friðriksson sjónum sínum að manninum Hannesi, meðal annars í ljósi einkabréfa og nýrra heimilda sem aldrei hafa komið fyrir almenningssjónir. Smám saman verður til mynd af margbrotnum en heillandi manni sem þrátt fyrir gæfu og gjörvileik þurfti að takast á við margvíslegt mótlæti.

Bókin var tilnefnd til Íslensku bókmenntaverðlaunanna árið 2005.