Bókin um Che gæðir hugsjónir og hugmyndir Che Guevara nýju lífi og skoðar manninn á bak við goðsögnina, mann sem var í senn tilfinninganæmur, ástríðufullur og staðráðinn í að fylgja sósíalískum draumum sínum alla leið. Í bókinni er einstök blanda fágætra ljósmynda og eigin orða Che sem gefur aðgengilega og sanna mynd af einum mikilvægasta byltingarmanni 20. aldar. Í bókinni er að finna yfir 250 myndir, yfir 100 tilvitnanir í rit Che, persónuleg bréf hans og ræður, ný viðtöl við nána vini og félaga, safn merkra veggspjalda og myndlistaverka, tímaás sem sýnir líf og ferli Che, kort af ferðum hans í byltingunni og greinar um lykilatburði í lífi hans.

Hulda Barrio fæddist í Havan og nam heimspeki og listasögu við Háskólann í Havana. Hún hefur kennt sendiráðsmönnum heimspeki, verið sýningarstjóri við Centro Wifredo Lam listastofnunina og þáttagerðarmaður við kúbverska sjónvarpið. Nú er hún sjálfstætt starfandi fræðimaður. Hún var myndaritstjóri Havana in my Heart: a celebration of Cuban photography eftir Gareth Jenkins (MQ Publications 2002).

Gareth Jenkins fæddist í Englandi, nam stjórnmálafræði, heimspeki og hagfræði við Háskólann í Oxford og tók meistarapróf í hagfræði. Hann er hagvanur á Kúbu og viðurkenndur sérfræðingur í kúbverskri menningu, viðskiptum og stjórnmálum. Hann er höfundur Havana in my Heart: a celebration of Cuban photography.

Andres Castillo tók próf í sagnfræði frá Háskólanum í Havana. Hann hefur rannsakað hernaðarsögu, verið blaðamaður og útvarpsmaður og skrifað ellefu bækur um kúbverska menningarsögu.