Árlega gefur Hið íslenska þjóðvinafélag út Almanak Hins íslenska þjóðvinafélags fyrir næsta ár ásamt Árbók Íslands um árið fyrir útgáfuárið.

Almanak Hins íslenska þjóðvinafélags kom fyrst út árið 1875 og hefur komið út árlega síðan. Almanakið var sett saman af Íslandsalmanaki háskólans í Kaupmannahöfn og ýmsu öðru efni til gagns og fróðleiks fyrir alþýðu manna. Árið 1923 færðist útgáfa og útreikningar Íslandsalmanaksins frá Kaupmannahöfn til Íslands og hefur svo verið síðan.

Dr. Þorsteinn Sæmundsson, stjörnufræðingur, hefur séð um útreikinga almanaksins frá 1964, fyrst með Trausta Einarssyni prófessor, en einn síns liðs frá 1969. Strax í fyrsta árgangi birtist Árbók Íslands sem hefur birst árlega síðan. Heimir Þorleifsson sagnfræðingur hefur haft umsjón með ritun hennar síðan 1983.