Í þessari bók eru tólf þættir úr íslensku þjóðlífi — frásagnir af eftirminnilegum atburðum og skemmtilegu fólki á fyrri tíð. Brugðið er upp myndum af lífi fólks í leik og starfi. Lýst átökum þess við óblíða náttúru og harðsnúin yfirvöld. Sagt er frá fólki á uppboði, læknisaðgerðum við erfiðar aðstæður, samgöngum og svaðilförum á landi og sjó, réttum og réttaferðum, brúðkaupssiðum og skemmtanalífi, og einnig sérstæðasta fréttaritara landsins fyrr og síðar „Oddi“ á Akranesi.

Þættirnir voru upphaflega samdir fyrir Ríkisútvarpið og fluttir þar haustið 1995. Hlutu þeir mjög góðar viðtökur hlustenda. Vegna óska fjölmargra var ákveðið að birta þættina í bókarformi. Nokkuð hefur verið aukið við þá frá upprunalegri gerð. Heiti þáttanna gefa hugmynd um fjölbreytt efni bókarinnar:

– Æðrulaus mætti hún örlögum sínum
– Réttir og réttaferðir í Borgarfirði
– Samgöngur og svaðilfarir
– Brúðkaupssiðir og brúðkaupsveislur
– Skemmtanalíf á Skaganum á fyrri tíð
– Um skottulækna og hómópata
– Fyrstu læknar í Borgarfirði
– Af Bjarna Ólafssyni skipstjóra
– Sandgerðisár Akurnesinga og upphaf verkalýðsbaráttu
– Ekkjan og yfirvaldið
– Æskuminningar frá Akranesi
– Fréttaritarinn Oddur

Höfundur bókarinnar, Bragi Þórðarson útgefandi, hefur áður sent frá sér bókaflokkana Borgfirsk blanda I-VIII, Sagnir og fróðleikur úr Mýra- og Borgarfjarðarsýslum, og Lífsreynsla I-III, frásagnir af eftirminnilegri og sérstæðri reynslu.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er um 7 klukkustundir að lengd. Höfundur les.