Gunnar Þór Bjarnason fæddist á Ísafirði 1957. Hann varð stúdent frá Menntaskólanum í Reykjavík, lauk BA-prófi í sagnfræði og þýsku frá Háskóla Íslands, MA-prófi í alþjóðasamskiptum frá sama skóla og stundaði framhaldsnám í sagnfræði í Þýskalandi. Hann kenndi í árafjöld við Fjölbrautaskólann í Breiðholti og hefur lengi verið stundakennari við Háskóla Íslands. Gunnar Þór hefur sinnt ýmsum félags- og útgáfustörfum innan sagnfræðinnar; var annar stofnenda Sagna, ritstýrði Nýrri sögu um hríð og sat í stjórn Félags sögukennara. Hann er nú formaður Félags um átjándu aldar fræði og situr í stjórn Sögufélags. Meðal rita Gunnars Þórs eru kennslubók í Íslands- og mannkynssögu og fræðirit um brotthvarf Bandaríkjahers frá Íslandi. Árið 2012 sendi hann frá sér bókina Upp með fánann! Baráttan um uppkastið 1908 og sjálfstæðisbarátta Íslendinga en hún fékk menningarverðlaun DV og var tilnefnd til Íslensku bókmenntaverðlaunanna og viðurkenningar Hagþenkis. Þremur árum síðar kom út eftir hann bókin Þegar siðmenningin fór fjandans til. Íslendingar og stríðið mikla 1914–1918. Hún hlaut Íslensku bókmenntaverðlaunin í flokki fræðibóka og rita almenns efnis og var tilnefnd til viðurkenningar Hagþenkis og menningarverðlauna DV. Forlagið (Mál og menning) gaf út báðar síðarnefndu bækurnar. Fyrir jólin 2016 kom verðlaunabók Gunnars Þórs um Ísland og heimsstyrjöldina fyrri út í nýrri, aukinni og ríkulega myndskreyttri útgáfu undir heitinu Stríðið mikla 1914–1918.