Algengar spurningar varðandi handritaskil og útgáfuhugmyndir
Þú mótar hugmyndina þína eins vel og kostur er og kynnir hana skriflega á einu A4 blaði og sendir okkur. Sendu myndir, hlekki eða annað ítarefni með sé þess þörf. Ekki er tekið við hugmyndum að skáldsögum, þar þarf í öllum tilfellum tilbúið handrit.
Fáðu yfirlestur og ábendingar frá fleiri en einum lesanda áður en þú sendir inn handrit. Góðar bækur spretta ekki úr einum kolli, þær eru margbrotin samstarfsverkefni þó yfirleitt sé bara eitt höfundarnafn á kilinum. Reyndu að fá fleiri en góðvini þína eða fjölskyldu til að lesa, það getur reynst gríðarlega dýrmætt að fá yfirlestur frá „hlutlausum“ lesanda. Vandaðu stafsetningu og frágang. Búðu þig undir langa bið, þetta tekur allt tíma. Ekki senda nýja gerð handritsins á meðan þú bíður eftir svari.
Við skoðum innsent efni og hugmyndir áður en fundir eru boðaðir. Ef hugmyndin er góð eða handritið er gott er það tekið fyrir og rætt á útgáfufundi. Þar er tekin ákvörðun um næstu skref, sem oftar en ekki er fundur höfundar með ritstjóra.
Um handritaskil
Forlagið skoðar öll handrit sem því berast. Vinsamlegast sendið handrit ásamt kynningarblaði í tölvupósti á netfangið handrit@forlagid.is. Krefjist efni handrits þess að því sé skilað útprentuðu skal það skilmerkilega merkt eiganda sínum og skilað á skrifstofu Forlagsins. Tilgreint skal þá hvort höfundur þess muni sækja það aftur að lestri loknum. Farið er með handritaskil til Forlagsins sem trúnaðarmál.
Mat hvers handrits tekur allt að 10-12 vikum og vegna kostnaðar við hvern yfirlestur óskum við eftir því að önnur forlög hafi handritið ekki til skoðunar á sama tíma.
Athugið að ekki er tekið við handritum á tímabilinu frá 1. júní til 1. október vegna anna á ritstjórn.
Þeir sem senda inn handrit fá svar en ekki eru skrifaðar umsagnir um handrit. Forlaginu ber ekki skylda til að rökstyðja ákvarðanir útgáfustjóra. Ef handriti er hafnað og ekki er tilgreint þegar það berst Forlaginu að það verði sótt verður handritinu fargað að lestri loknum.