Tvær vinsælar bækur saman í pakka!

Bjór – umhverfis jörðina á 120 tegundum
Næst á eftir tei og vatni er bjór vinsælasti drykkur jarðarbúa og nánast hvert land jarðar á sína sérstöku bjórsögu. Á síðustu áratugum hefur áhugi á bjórmenningu og bjórgerð aukist víða um lönd eftir því sem örbrugg­ húsum hefur vaxið fiskur um hrygg og framboð af fjölbreyttum bjórtegundum aukist.

Stefán Pálsson og Höskuldur Sæmundsson hafa um árabil frætt Íslendinga um lystisemdir bjórsins í hinum stórvinsæla Bjórskóla og miðla nú af þekkingu sinni í fyrstu bjórbókinni sem kemur út á íslensku í áraraðir. Í félagi við Rán Flygenring fara þeir í heimsreisu með hjálp 120 bjórtegunda sem allar eiga það skilið að menn dreypi á þeim einhvern tíma á lífsleiðinni.

Vín – umhverfis jörðina á 110 flöskum
Það er gömul speki hjá grónum vínræktar- og bjórgerðarþjóðum, að ef ætlunin sé að drekka bæði vín og bjór og halda haus skuli vínið koma á hæla bjórnum. Þessa viska aldanna réði því líka að á hæla metsölubókarinnar Bjór kemur nú stórvirkið Vín.

Heimur vínsins er margbrotinn og fjölskrúðugur, enda er hvert vín einstakt. Það er afrakstur veðurs og vinda, jarðar og gróðurs, umhyggju og natni, hefða og hugvits. Fáir núlifandi menn í Norður-Atlantshafi þekkja þennan heim jafn náið og Steingrímur Sigurgeirsson sem hefur um áratugaskeið frætt samferðarmenn sína um unaðssemdir vínsins og bragðað á jafnvel sjaldgæfustu veigum jarðar.

Hvort sem það er rautt eða hvítt, freyðandi eða sætt, bleikt eða styrkt: aldrei kemur lesandinn að tómum kofunum hjá Steingrími. Hann opnar 110 vínflöskur, lýsir uppruna og einkennum, og leiðir þekkingarþyrsta lesendur með sér í töfrandi heimsreisu.

Líkt og í Bjórnum er það listateiknarinn Rán Flygenring sem lýsir einkennum og eðli tegundanna og hefur sér nú til fulltingis þær Lóu Hjálmtýsdóttur og Siggu Björgu. Saman skapar þetta landslið íslenskra teiknara myndrænt meistaraverk sem lyftir viðfangsefninu á nýtt og æðra svið.