Litagleði er fræðirit um litafræði eftir Helgu Jóhannesdóttur litafræðing og kennara í fata- og textílgreinum við Fjölbrautaskóla Suðurlands. Bókin gagnast jafnt í hönnun sem listgreinum og sem almennar upplýsingar fyrir alla þá sem vilja dýpka skilning sinn á litasamsetningum. Litafræði er nauðsynleg þeim sem fást við ljósmyndun, myndlist, mynsturgerð, fatasaum og fleira mætti telja.

Bók Helgu byggir meðal annars á litafræðum svissneska expressíonistans Johannesar Itten (1888-1967) sem setti fram andstæðukenningu um liti. Fjallað er um samsetningu lita, frumliti, hinn tólfskipta litahring og hvernig lesa beri í liti. Þá er sérstakur kafli helgaður því hvernig unnið er með liti og annar hvernig fá má innblástur í því er varðar liti og litaval. Aftast í ritinu eru svo yfirlitslistar er varða fólk, hugtök og heimildir.

Litagleði er ferningslaga harðspjalda bók, liðlega 200 mm á hvern kant. Fjórlitaprentun á þykkan og vandaðan pappír. Þá er bókin saumuð með aðferð sem miðar sérstaklega að því að hún geti legið flöt og opin á borði sem hentar sérstaklega þar sem hún er notuð við kennslu og leiðsögn við vinnu.