Páll Baldvin Baldvinsson, höfundur stórvirkisins Stríðsárin 1938-1945, segir frá bók sinni í fyrirlestrasal Norræna hússins, miðvikudaginn 9. desember. Páll sýnir brot af hinum fjölmörgu myndum sem prýða bókina og fræðir gesti um þetta mesta breytingarskeið Íslandssögunnar.
Dagskráin hefst kl. 20 og aðgangur er ókeypis.
Í Stríðsárunum er Ísland fært inn á landakort heimsstyrjaldarinnar síðari og sýnt hvernig það varð órofa hluti af hildarleiknum sem fram fór um víða veröld – og ekki síst á hafinu kringum landið. Grimmd, lífsþorsti, hetjudáðir og hryllingur stríðsátakanna er dreginn fram í fjölda frásagna, fréttaskeyta, leyniskjala, dagbóka og minningabrota, auk þess sem verkið geymir aragrúa ljósmynda, innlendra og erlendra, sem margar koma nú í fyrsta sinn fyrir almenningssjónir.
Páll Baldvin Baldvinsson, bókmenntafræðingur og menningarrýnir, hefur um árabil haft brennandi áhuga á þessu einstæða tímabili í sögu þjóðarinnar. Verkið er afrakstur gríðarlega umfangsmikillar vinnu hans við söfnun ljósmynda, endurminninga og annarra heimilda um stríðsárin.
