Flækingurinn, ný skáldsaga Kristínar Ómarsdóttur, hefur þegar hlotið frábæra dóma en nú er vika síðan bókin kom út.
Bókin var til umfjöllunar hjá gagnrýnendum Kiljunnar í síðustu viku og voru þau sammála um ágæti bókarinnar. Friðrika Benónýsdóttir sagði m.a. „Kristín er einstakur höfundur … meistaralega gert … á mörkum óraunveruleika en samt alveg „brútallí“ raunsætt … Kristín er í algjörum sérflokki. Hún gerir þetta á svo snilldarlegan hátt að ég stoppaði hvað eftir annað á meðan ég var að lesa og reyndi að leggja þessar setningar á minnið.“
Þetta tóku þeir Egill og Þorgeir Tryggason undir en sá síðarnefndi sagði m.a. „Með því að vera svona skýr og nákvæm tekst henni að lýsa heimssýn sem er svo óvenjuleg … magnað verk … einstök rödd fyrir mállausan mann.“
Vigdís Grímsdóttir hefur sömuleiðis lofað bókina á Facebook og segir þar: „Ef þú vilt ganga inn í heim sem þú þekkir ekki nema af afspurn, þá lestu bókina! Ef þú vilt sjá mannréttindi í því ljósi að þú verður að krefjast þeirra, þá lestu bókina! Ef þú vilt finna ný tækifæri í íslenskunni, þá lestu bókina! Ef þú vilt skemmta þér innilega og njóta stundanna, þá lestu bókina. Ef þú vilt ekkert af þessu, þá missirðu einfaldlega af miklu. Í alvöru!“
Bókaunnendur ættu ekki að láta þessa frábæru skáldsögu fram hjá sér fara.