Ný bók um Kaftein Ofurbrók er nýkomin út í Bandaríkjunum og ber titilinn Captain Underpants and the Terrifying Return of Tippy Tinkletrousers. Aðdáendur Ofurbrókarinnar hafa þurft að bíða lengi eftir nýrri bók en þetta er fyrsta bókin um kappann í sex ár. Íslenskir aðdáendur þurfa ekki að bíða lengi því allt var sett á fullt hér hjá Forlaginu til að þýða og gefa bókina út fyrir jól.
Höfundur bókanna um Kaftein Ofurbrók, Dav Pilkey, hefur ferðast um Bandaríkin til að kynna bókina og tók hann einnig þátt skemmtilegu heimsmeti. Bókabúð ákvað að reyna að slá heimsmet í hversu margir væru samankomnir með nærbrók á höfðinu. Hundruðir manna söfnuðust saman með nærbrækur á höfðinu og þar var Dav Pilkey fremstur í fararbroddi með Svampur Sveinsson-brækur á hausnum.
Nýja bókin um Kaftein Ofurbrók mun koma á íslensku mátulega fyrir jólin en þangað til er hægt að skemmta sér yfir fyrri bókunum, eins og Kafteinn Ofurbrók og líftæknilega horskrímslið eða dunda sér í Kafteinn Ofurbrók í drepfyndinni vinnubók.