Don Kíkóti eftir spænska rithöfundinn Miguel de Cervantes (1547-1616) er án efa ein skemmtilegasta og vinsælasta skáldsaga heimsbókmenntanna. Aðalpersónan, don Kíkóti, er búinn að lesa riddarasögur sér til óbóta og hefur tapað vitglórunni. Hann ákveður að ferðast út í heiminn til að koma góðu til leiðar, geta sér eilífan orðstír og vinna hjarta konunnar sem hann elskar. Hann heldur af stað ásamt hinum jarðbundna aðstoðarmanni sínum, Sansjó Pansa, en í huga riddarans breytast vindmyllur í risa, kindahópar í óvinaheri og bændastúlkur í fagrar prinsessur.

Miguel de Cervantes skopstælir riddarasögur, sem voru rómantískar sápuóperur þess tíma, svo lesandinn veltist um af hlátri yfir óförum don Kíkóta á leið hans um spænskar sveitir. En jafnframt er mannkærleikur riddarans einkar hjartnæmur. Hann gefst aldrei upp, en er rekinn áfram af óstöðvandi gæsku og heilagri vitfirringu og ríkt ímyndunarafl hans fegrar umheiminn sem við honum blasir og breytir honum í veröld sögubókanna sem hann hefur lesið.

Don Kíkóti hefur verið kölluð fyrsta nútímaskáldsagan og hún hefur veitt lesendum og rithöfundum óþrjótandi innblástur á þeim 400 árum sem liðin eru frá því hún var skrifuð. Í persónum don Kíkóta og Sansjó Pansa og ævintýrum þeirra kristallast andstæður hugsjónar og veruleika, sannleika og tálsýnar, glópsku og skynsemi, listar og lífs. Sagan er sögð af svo mikilli hugkvæmni og frásagnarlist að undrum sætir.

Bókin er prýdd fjölda mynda eftir Gustave Doré sem gefur útgáfunni aukið gildi.

Guðbergur Bergsson þýddi bókina og er ekki ofmælt að um afrek sé að ræða.